عروض البلاك فرايداي لشركات الاستضافة بعضها بدأ والباقي هيظهر بالتدريج اليومين القادمين..
المنافسة شرسة جدا السنه دي .. و المفروض انك تكون حاليا واخد قرارك النهائي في الشركة اللي هتشترك فيها و تعتمد عليها في استضافة شغلك السنة او السنتين القادمتين.
———————————-
اي واحد قديم شوية في المجال هيقدر يقولك ان الاستضافة الجيدة ليها دور مهم جدا جدا جدا جدا في نجاح الموقع.
بداية من سرعة السيرفر اللي ليها تأثير مباشر على السيو و مرورا بتقنيات الكاش اللي بتحسن تجربة المستخدم و محركات البحث بشكل كبير و وقوفا عند وجود اي بي خاص بالموقع و و انهتاء مؤقتا عند قدرة السيرفر على التعامل مع ضغط الزيارات و سياسة الشركات في التعامل مع هذا الضغط.
كل دي عوامل بنضطر أننا نتجاهل جزء كبير جدا منها بسبب ارتفاع أسعار الاستضافات التي توفر المميزات دي بشكل عام.
وبعد كده ييجي البلاك فرايدي … و الشركات اللي كانت مستبعدة طول السنة تنزل خصومات تصل ل 75% . الخصومات دي هي فرصتك الحقيقية في تجربة معنى استضافة محترمة تقدر تعتمد عليها في تحمل شغلك و أحمال الموقع.
بوست العروض السنة دي هيكون مختلف شوية في طريقة العرض , عشان اقدر اتفادى نقاط النقاش اللي كنا بندخل فيها المرات اللي فاتت – هنتكلم عن كل كبيرة و صغيرة محتاج تفكر فيها في اليومين الجايين عشان تختار الشركة المناسبة ليك.
يا ريت تعمل Save للبوست عشان هيتعدل أكثر من مرة الأيام الجاية و هضيف عليه بعض العروض المتميزة القوالب والاضافات لما تنزل بالتتابع
————————————
قبل ما ندخل في التفاصيل خليني ابدأ البوست بمجموعة من النصائح العاملة للجميع :
1- العروض بشكل عام بدأت يوم 25 وتستمر حتى 3 ديسمبر ( هناك فروقات صغير بين الشركات في هذه التواريخ).
2- أفضل موعد للشراء هو يوم 29 … و ده بسبب ان شركات كثير السنة دي بتغير الخصم اللي بتقدمه بشكل يومي و اعلى خصم هيكون يوم 29.
3- افضل وقت للشراء يوم 29 هيكون في منتصف اليوم, وده لسببين (بلاش آخر اليوم عشان لو ظهر عندك مشاكل في وسيلة الدفع ماتدخلش في يوم جديد) و بلاش اول اليوم عشان السنة الجاية تكون استضافتك لسه شغالة اثناء طرح عروض الشركات التانية لو حابب تنقل.
4- لو تقدر اشتري اكثر من سنة عشان تستفيد من الخصم الكبير, التجديد بيكون كبير شوية بعد انتهاء المدة الاولى.
5- جميع الشركات اللي هرشحها هنا في البوست تمتلك سيرفرات في اوروبا – تأكد من اختيار السيرفر المناسب لك اثناء الحجز عشان هيكون في مصاريف نقل اضافية لو اخترت غلط.
6- لو ملحقتش تشتري في البلاك فرايدي .. خليك جاهز يوم الاثنين القادم هيبقى في عروض Cyber monday لمدة يومين … حاول تلحقها.
———————————————-
بعد ما قلنا النصائح العامة .. خلينا نستعرض المواصفات العامة لشركة الاستضافة الجيدة .. يعني لما تدور على استضافة تسندك , تدور على ايه ؟
1- موقع سيرفر الاستضافة (كلما كان أقرب من الزائر كلما كان أفضل) – الأفضل للدول العربية بشكل عام هي سيرفرات أوروبا ( بالترتيب : فرانكفورت – أمستردام – لندن .. )
2- تقنيات الكاش التي تقدمها الاستضافة ( كاش الاستضافة يختلف عن كاش الموقع اللي بتعملة بإضافة الكاش عندك .. و الاثنين مع بعض هيوفرلك أخف أداء و أفضل سرعة و كمان يسمحوا للاستضافة انها تتحمل زيارات أكثر.
3- اعدادات السيرفر لازم تكون مجهزة لتحقيق أفضل أداء في مصلحة العميل و ليس في مصلحة الشركة. أكبر مثال على هذه النقطة هو Memory limit , خاصية في السيرفر لو قيمتها عالية ووردبريس بتقدر تتعامل مع الاضافات الكبيرة و تعمل فحص فيروسات و حفظ نسخ احتياطية باحجام كبيرة بدون اي مشاكل و لو قيمتها صغيرة كل العمليات دي بتعطل في النص و مابتكملش. على فكرة الخاصية دي في الاستضافات الرخيصة دايما قليلة لانها بتمثل حمل على السيرفر وتمنعهم من زيادة عدد الحسابات على السيرفر.
4- طبعا لازم الشركة تكون بتوزع عدد قليل من العملاء على السيرفر عشان تقدر توفر لهم الموارد الجيدة اللي بيدفعوا مقابلها التكلفة الأعلى. – و هنا فرق جوهري بين الاستضافات الرخيصة و الاستضافات القوية5- دعم شهادات الحماية SSL مجاناً.
6- خدمة باك اب الطوارىء – يوميا او اسبوعيا على حسب نوع الباقة. (مهمة حتى في حال وجود اضافة باك أب على ووردبريس)
7- الدعم الفني (لازم يوجد شات – المراسلة بالايميل قد تكون مقبولة عند البعض بالنسبة لي غير مقبولة)
8- استعداد الدعم الفني لتشخيص و حل المشاكل البسيطة اذا كانت غير مرتبطة بالسيرفر.
———————————————-
بعد ما خلصنا النصائح و المواصفات .. باقي حاجة واحدة عايز انتهى منها قبل استعراض العروض …
و هي: معضلة نيم شيب
نيم شيب شركة عملاقة – عندها القدرة انها تقدم عروض كل سنة بتكون هي الاقوى بدون منافس.
عروض نيم شيب السنة دي لسه مش عارف شكلها ايه … كل سنة في المعاد ده بيكونوا أرسلوا كل تفاصيل العروض .. السنة دي الكتمان هو السائد و اكتفوا بتحديد موعد العروض من 29 ولمدة 4 أيام متواصلة . فخلينا نشوف.
لكن …. وبقول لكن ..
على القدر اللي كلنا بنفرح بيه بعروض نيم شيب .. لا يجوز بالعقل او المنطق ان ندعي انها تجاري الاستضافات الأغلى.
انا شخصيا عندي استضافتين على… نيم شيب … و بجددهم … عشان مهمين جدا في شغلي .. و مواقع العملاء و ومواقع الشخصية الجديدة بتبدأ من نيم شيب .. لكن بمجرد ما اي موقع يبتدى يشتغل او يشوف النور … لازم يتم نقلة الى شركة افضل .. و صدقني لما بقولك لازم.
نيم شيب لا تقدم اي تقنيات كاش (بتكلم عن باقات الشيرد).
رد فعل السيرفر عند استقبال عدد كبير من الزوار في نفس اللحظة هو خطأ رقم 500. و ده بيزعل جوجل جداً. و انت غالبا مش هتاخد بالك منه لانك في اللحظة التالية هتدخل الموقع هيشتغل لان الحمل اقل من اللحظة اللي فاتت.
امال بتعرف ازاي ( هتلاقي في مدير المواقع في جوجل الخطأ ده بيظهر من فترة للتانية
بشكل مزعج ومتكرر)
نيم شيب سيرفراتها عليها قيود محترمة في التعامل مع الملفات الكبيرة … و فترة الانتظار للعمليات قصيرة جدا .. وده هيديك Timeout عند محاول حفظ باك اب لموقعك او تفعيل ديمو من قالب جديد. و هتضطر ترفعة يدوي من خلال لوحة تحكم سي بانيل .. وده بالنسبالي عيب مزعج جدا.ده غير ال memory limit اللي اتكلمنا عليه .. نيم شيب بتقدم رقم كوميدي.
خلاصة الكلام … نيم شيب عروضها كلنا لازم نشترك فيها .. لكن نصيحة مني ما تحطش عليها شغلك الرئيسي .. و اي واحد هيقول ان الشركات زي بعض هيكون اما ماجربش شركات كثير او انه جرب .. لكن المواقع بتاعته دايما بتتحرك في النطاق الآمن.
——————————————————————–
العروض المميزة في بلاك فرايداي 2019
الي كان متابع بوستات العروض السنين اللي فاتت … يلاحظ اني كنت دايما بشجع شركتين بالتحديد
A2hosting
Fastcomet
السبب الرئيسي في ترشيح الشركتين دول على الرغم من اني افيلييت في اكثر من 17 شركة هو ان دول اول شركتين يوفروا سيرفرات في اوروبا ,اللي بيكون ليها دور كبير جدا في أداء المواقع العربية – أكثر من السيرفرات الامريكية اللي بتوفرها بقية الشركات.
—————
طيب … هل الترشيحات دي زي ما هي و دول افضل شركتين في وجهة نظري ….
لا … لسببين :
اولاً: ازدياد عدد الشركات التي اصبحت تمتلك سيرفرات في اوروبا بشكل كبير
ثانياً : تغيرات طرأت على الشركتين دول استدعت تغيير الترتيب.
——————
A2hosting
كانت و لازالت اسرع استجابة للسيرفرات للمواقع العربية .. ولكنها في السنة الاخيرة سيرفراتها بتعاني من فترات انقطاع غير مقبولة نهائيا بسبب مشاكل فنية .
الفترات ممكن ماتكونش كبيرة .. لكن عدم وجود دعم بواسطة الشات و الاضطرار الى مراسلتهم عن طريق HelpDesk و انتظار الرد بشكل متكرر.
كل العوامل دي اضطرتني اني انزل ترشيح A2 من المركز الأول السنين اللي فاتت للمركز الخامس او السادس السنة دي.
——————-
طيب مين الافضل في 2019
باختصار … المنافسة بين
FastComet
SiteGround
كل شركة منهم لها ما لها وعليها ما عليها و هنناقشهم بالتفصيل
ولكن كلاهما يتفقان في التاني :
- سيرفرات دولية في أكثر من دولة : سايت جراوند 4 و فاست كوميت 10 سيرفرات.
- شهادات الحماية SSL مجانية و سهلة التركيب و التفعيل.
- استجابة سيرفرات رائعة. (407 مللي ثانية فاست كوميت و 378 مللي ثانية سايت جراوند للمواقع العربية من سيرفرات أمستردام – قياساتي الشخصية)
- تعامل جيد جدا مع ووردبريس (siteground بترشيح من موقع ووردبريس الرسمي)
- فترات العمل دون انقطاع ممتازة(Server Uptime)
- استرجاع الأموال بالكامل خلال 30 يوم.
خلونا بقى نحلل كل واحدة فيهم بالتفصيل عشان تقدر تاخد قرار أفضل في الاختيار بينهم
اولا: فاست كوميت
فاست كوميت عروضها بدأت من يوم 25 وهي حاليا 65% خصم. و هقولك على سر:
يوم 29 هتكون 75% … عشان كده قلتلك ماتشتريش غير يوم 29.
فاست كوميت و سايت جراوند قاموا بإلغاء الدومين المجاني السنة اللي فاتت, لكن فاست كوميت بتقدم نقل الدومين مجانا مع كل باقة جديدة … يعني لو عندك دومين على شركة تانية قرب ينتهي .. تقدر تنقله على فاست كوميت مجانا عند الحجز و تاخد تجديد سنة مجاناً عليه.
أهم ما يميز فاست كوميت هو تكنولوجيا الكاش اللي بتقدمها , و اللي بتخلي موقعك طلقة . لكن للأسف موجودة على الباقة العالية فقط. Memcache, xvarnish, LSPI, OPcode
الباقة العالية هتقدر تشتريها ب 60 دولار بس بدلا من السعر الأصلي 240 دولار يوم 29.
الباقة المتوسطة هتقدر تشتريها 45 دولار بدلا من قيمتها الاصلية 180 دولار يوم 29.
الباقة الصغيرة هتقدر تشتريها ب 30 دولار بدلا من 120 دولار يوم 29.
طيب ازاي تختار الباقة المناسبة ؟
فاست كوميت بعتبرها اكثر شركة عندها شفافية في عرض مواصفاتها … عشان كده لا تستخدم كلمة باندويث غير محدود و لا نهائي و المصطلحات دي الا نادرا . لان مافيش شركة بتستخدم المصطلحات دي الا و بيبقى عندها سياسة استخدام عادل مستخبية في مكان ما عشان تحدد استخدامك بعد ما تشتري.
فاست كوميت بتحدد الاستخدام بحاجتين .. عدد الزوار و ليس الزيارات … و الحد الأقصى للباندويدث
الباقة الصغيرة تتحمل حتى 25 الف زائر شهريا او 30 جيجا باندويث
الباقة المتوسطة تتحمل حتى 50 الف زائر شهرياً او 61 جيجا باندويث
الباقة الكبيرة تتحمل حتى 100 الف زائر شهريا او 92 جيجا باندويث
اعمل حساباتك على عدد الزوار اسهل .. و انتبه ان الباندويدث كافية جدا لو موقعك معمول له صيانه بشكل جيد و اعدادات الكاش و ضغط الصور فيه صحيحة.
ملحوظة تانية :
فاست كوميت بتقدم نقل مجاني ل 3 مواقع على الباقات المتوسطة و الكبيرة .. و لا يوجد نقل مجاني للباقة الصغيرة . لو انت اشتركت في الشركة من خلال الرابط الخاص .. و عندك اكثر من 3 مواقع او موقع على الباقة الصغيرة .. تواصل معي و سأتولى أنا بإذن الله نقل المواقع الإضافية بدون مشاكل.
ثانيا : سايت جراوند
سايت جراوند .. استضافة من عالم آخر … و خليني افهمك ازاي
الاستضافة دي بدأها 4 اشخاص من 2004 كانها Startup
و كبرت و توسعت و بقى فيها موظفين كثير و سيرفرات حول العالم … و طوال الفترة اللي فاتت كان عندهم مبدأ واحد :
الجودة هي الأهم حتى لو جائت على حساب السعر .. عشان كده دايما سايت جراوند كانت في منطقة سعرية اغلى عن المنطقة اللي بندور فيها .. لكن بامانه هي من افضل الشركات اللي ممكن تتعامل معاها في حياتك على الانترنت.
الدعم الفني ممتاز و سرعة استجابة السيرفر (378 مللي ثانية للمواقع العربية من سيرفر امستردام)
الشركة بتقدم نقل مجاني لموقع واحد فقط .. لكن نفس الكلام لو اشتركت عن طريقي تواصل معايا و انا هنقلك المواقع بتاعتك بشرط ان يكون حسابك في الاستضافة القديمة لا يزال يعمل.
سايت جراوند هي الشركة الوحيدة اللي اعرفها بتقدم تكنولوجيا كاش متطورة من نوع memcache بداية من الباقة المتوسطة و ليس من الباقة الكبيرة كباقي الشركات.
, و الباقة الكبيرة فيها اكثر من 6 تقنيات كاش بالاضافة للعمل بنظام HTTP2 الاسرع في نقل البيانات.
عرض سايت جراوند السنة دي خصم 75% بداية من يوم 29.
الباقة الصغيرة تتحمل حتى 10 الآف زائر هتقدر تجيبها ب 36 دولار بدلا من السعر الاصلي 144 دولار يوم 29.
الباقة المتوسطة تتحمل حتى 25 الف زائر هتقدر تشتريها بسعر 60 دولار بدلا من السعر الاصلي 240 دولار يوم 29.
الباقة الكبيرة تتحمل حتى 100 الف زائر شهرياً بسعر 105 دولار بدلا من السعر الاصلي 420 دولار يوم 29.
لاحظ ان اسعار التجديد في سايت جراوند هتكون غالية بعد كده .. فلو انت مش ناوي تغير الهوست السنة الجاية فكر في حجز مدة اطول.
—————————————–
وبعد ما عرضنا مميزات و عيوب افضل شركتين السنة دي من وجهة نظري …
نا عارف ان في ناس برضه مستنية الخلاصة .
الخلاصة كالتالي :
سايت جراوند هي الاقوى بشكل عام … و عشان كده هي الاغلى … هي مناسبة للمواقع اللي معدل الزيارات ثابت و عايزة تقدم افضل اداء.
لكن فاست كوميت السنة دي بصراحة تفوقت على نفسها و بتقدم افضل قيمة مقابل سعر … المواصفات اللي هتشتريها ب 60 دولار في اعلى باقة عند فاست كوميت … مواصفات سايت جراوند بتقدمها في السعر العادي ب 420 دولار و نيم شيب لا يمكن تفكر تقدمها ابدا.
قوة الشركات دي لا تستدعي بالضرورة ان مافيش شركات تانية كويسة .. لكن المجال لا يتسع لاستعراض شركات اخرى و الاثنين دول اثبتوا كفائتهم معايا على مدار السنين اللي فاتت بجدارة.
—————————————
بالمرة و عشان انا عارف ان السؤال ده هيتسأل … ايه هو افضل VPS
عشان ما اتوهكش كثير … سايت جراوند مش نازلة بعروض على ال VPS السنة دي.
فاست كوميت نازلة بخصم 30% على ال VPS يوم 29 .
لكن الشركتين اساسا اسعارهم غالية عشان الجودة عالية جدا.
لو عايز VPS محترم يخدم المواقع العربية جرب A2hosting مع العلم ان مشاكل السيرفرات اللي قلت انها موجودة مع شركة ايه تو مقتصرة على باقات الشيرد و لم اعاني منها على ال VPS.
اما لو عايز vps رخيص و مش فارقة معاك تقنيات و مكان السيرفر فالاختيار المنطقي هيكون namecheap .. لكن ده طبعا في ال VPS فقط لاننا شرحنا ليه الباقات الشيرد عند نيم شيب لا يعتمد عليها كاستضافة رئيسية.
—————————————–
اخيراً :
لو شايف اني قدرت افيدك بحاجة و قدرت اسهل عليك قرار اختيار شركة مناسبة .. (بعد اذن ادارة الجروب ) دي روابط الافيلييت الخاصة بحساباتي لو عايز تشترك عن طريقى.
رابط استضافة سايت جراوند : bit.ly/2R4kB5v
رابط استضافة فاست كوميت : bit.ly/2FyNs0r
رابط استضافة ايه تو هوستنج : bit.ly/2PMqLut
رابط استضافة نيم شيب : namecheap.pxf.io/0zYmN
ولو عندك مشاكل في اختيار الباقة او نقل المواقع بعد الشراء تواصل معي و انا هنقلهالك باذن الله.
و ماتنساش تعمل Save للبوست عشان لو نزل عروض مميزة تانية اليومين الجايين هضيفها هنا.
——————
شكرا لكم .. و اسف على الاطالة
أُبَي شوقي
